Yeni KRİZ: Böyük Britaniya səfiri Rusiya Xarici İşlər Nazirliyinə çağırılıb

Rusiya Ukrayna ordusunun Sevastopolda Rusiyanın Qara Dəniz Donanmasına hücumu zamanı Britaniyadan dəstək aldığını iddia edib.

Busaat.az xəbər verir ki, məhz bu səbəbdən Böyük Britaniyanın Moskvadakı səfiri Debora Bronnert Rusiya Xarici İşlər Nazirliyinə çağırılıb.

Səhər saatlarında Rusiya Xarici İşlər Nazirliyinə gələn səfir Bronnertə binanın girişində bir qrup Rusiya vətəndaşı etiraz edib. Bronnert “Britaniya terror ölkəsidir” şüarları və pankartlarla qarşılanıb. Təxminən yarım saat nazirlikdə qalan Bronnert görüşündən sonra jurnalistlərin suallarını cavablandırmadan binanı tərk edib.

Qeyd edək ki, daha əvvəl Rusiya Xarici İşlər Nazirliyinin sözçüsü Mariya Zaxarova oktyabrın 29-da Ukrayna Silahlı Qüvvələrinin pilotsuz uçuş aparatları ilə Sevastopolda Rusiyanın Qara Dəniz Donanmasının gəmilərinə və infrastrukturuna dəniz və hava hücumları həyata keçirdiyini xatırladaraq qeyd edib: “Bu hərəkətlər Kiyev tərəfindən britaniyalı mütəxəssislərin rəhbərliyi altında həyata keçirilib. Bu kontekstdə Britaniya səfiri yaxın vaxtlarda Rusiya Xarici İşlər Nazirliyinə çağırılacaq”.

Busaat.az