Türkiyə və Rusiya rəsmiləri taxıl müqaviləsini müzakirə edib

Türkiyə xarici işlər nazirinin müavini Burak Akçapar Moskvada Rusiya xarici işlər nazirinin müavini Sergey Verşinin ilə taxıl sazişinin tam icrasını müzakirə edib.

Busaat.az Türkiyə mediasına istinadən xəbər verir ki, bu barədə Rusiya Xarici İşlər Nazirliyi məlumat yayıb.

Akçapar və Verşinin ayrı-seçkilik və ilkin şərtlər olmadan ehtiyacı olan hər kəsə geniş humanitar yardımın çatdırılmasının vacibliyini vurğuladıqları bildirilib.

Qeyd edilib ki, Akçapar və Verşinin iyul ayında İstanbulda imzalanmış sazişlərin (“Ukrayna taxılının ölkə limanlarından çıxarılmasına dair “Qara dəniz təşəbbüsü” və Rusiya-BMT Anlaşma Memorandumu – red.) həyata keçirilməsini müzakirə ediblər.

Məlumata görə, hər iki sazişin bir-biri ilə birgə tam şəkildə həyata keçirilməsi qlobal ərzaq təhlükəsizliyinə təhdidlərin azaldılmasına kömək edəcək və Afrika, Asiya və Latın Amerikasının ən həssas ölkələrinə dəstək verəcək.

Busaat.az