2 milyardlıq İDDİA: BƏƏ Bayraktar bazası qurur...

 Birləşmiş Ərəb Əmirlikləri Türkiyədən sonra ən böyük Bayraktar TB2 SİHA bazasını qurmaq üçün hərəkətə keçib. Belə ki, Ərəb mətbuatı BƏƏ-nin 120 TB2 SİHA sifariş etdiyini və dəyərinin 2 milyard dollara yaxın olduğunu yazıb. Ərəb mətbuatının iddiasına görə, Bayraktar TB2 SİHA-lrının alınması ilə bağlı Türk tərəfi ilə danışıqlar aylardır davam edir. BƏƏ-nin toplu satın alma niyyətlərinin olduğu və artıq 120 ədəd SİHA-nın sifariş verildiyi bildirilir. Məlumata görə, SİHA-nın tədarük paketinə çoxlu sayda döyüş sursatı, komanda-idarəetmə mərkəzləri və təlim paketləri daxildir.

Qeyd edək ki, silah sənayesində yeni olmasına baxmayaraq, Bayraktar TB2 SİHA-ları özünü sübut edib və davamlı olaraq dünyanın gündəmində aktuallığını qoruyan hərbi-texniki avadanlıqdır. SİHA-lar Liviyada, Suriyada və Ukraynada üzərinə düşən vəzifələri maksimum dəqiqliklə yerinə yetirib. SİHA-lar müxtəlif ölkələrin ən müasir silahları ilə həm döyüş meydanında, həm də satış bazarında rəqabətə dözümlülüyü ilə fərqlənir.

Bayraktar TB2 SİHA-ları həmçinin Azərbaycan ordusunun 2020-ci ildə başlatdığı “Vətən Mnüharibəsi” zamanı da yüksək dəqiqliyi ilə seçilib və Ermənistan tərəfinin canlı və texniki hədəflərini dəqiq zərbələrlə sıradan çıxarıb. SİHA-ların aktiv fəaliyyəti sayənsində Azərbaycan ordusu əməliyyatlar zamanı qısa zamanda böyük uğurlar əldə edib.

Bayraktar TB2 SİHA-ları Türkiyə istisna 20 ölkəyə ixrac edilib. Bu günə qədər 20 fərqli ölkəyə 96 ədəd ixrac edilən SİHA-ların Türkiyə arsenalındakı sayı 200-ə yaxındır. Sifariş təsdiqləndikdən və ixracat həyata keçirildikdən sonra Birləşmiş Ərəb Əmirlikləri Türkiyədən sonra ən çox Bayraktar TB2 SİHA-larına sahib ikinci ölkə olacaq.

Busaat/az Həşim Səhrablı