Avropa Birliyinin (AB) Çinin Rusiyaya hər hansı silah tədarük etdiyinə dair indiyədək heç bir sübutu yoxdur.
Busaat.az xəbər verir ki, bunu Avropa Komissiyasının sədri Ursula fon der Leyen bildirib.
Diplomat Almaniya kansleri Olaf Şolz ilə birgə mətbuat konfransında deyib: “Hələlik buna dair heç bir sübutumuz yoxdur, lakin vəziyyəti gündəlik izləməliyik”.
O, Pekinin Moskvaya hərbi yardım göstərəcəyi təqdirdə ona qarşı mümkün sanksiyalara toxunaraq qeyd edib: “Bu hipotetik sualdır və yalnız reallaşdıqda cavab verilə bilər”.
Qeyd edək ki, ABŞ dövlət katibi Antoni Blinken fevralın 18-də Çinin Ukraynada istifadə olunacaq silah və sursatları Rusiyaya tədarük etməyi düşündüyünü iddia edib. Pentaqonun sözçüsü Patrick Ryder də ABŞ ordusunun Çindən Rusiyaya heç bir silah transferi qeydə almadığını, lakin Çinin belə bir variantı nəzərdən keçirdiyini istisna etməyib. Buna cavab olaraq Çin Xarici İşlər Nazirliyinin sözçüsü Mao Ning bildirib ki, Çin hakimiyyəti ABŞ-ın Moskvaya hərbi dəstək iddiası ilə bağlı təhdid və təzyiqlərinə dözməyəcək.
