ABŞ-ın Şimali Karolina ştatında təxminən 40 min insanın işıqsız qalmasına səbəb olan yarımstansiyaya hücumla bağlı istintaq başladılıb. İstintaq prosesinə Federal Təhqiqat Bürosu (FBİ) də daxil edilib.
Busaat.az xəbər verir ki, Moore Polis Ofisinin verdiyi açıqlamada bildirilib ki, yarımstansiyada həftə sonu atışma baş verib və bu atışma qəsdən törədilib.
Hücumun səbəbkarları və motivləri ilə bağlı hələlik heç bir məlumat paylaşılmasa da, FBİ-nin də istintaqa cəlb olunduğu bildirilir.
Rəsmilər hücumun yarımstansiyaya milyonlarla dollar ziyan vurduğunu və təmirin bir neçə gün çəkə biləcəyini deyirlər.
Yarımstansiya təmir olunana və əlavə təlimatlar verilənə qədər ərazidəki məktəblər də bağlanacaq.
Qeyd edək ki, şənbə günü axşam ABŞ-ın Mur rayonunda elektrik yarımstansiyasına edilən hücum nəticəsində təxminən 40 000 adam qaranlıqda qalıb və yerli hakimiyyət təhlükəsizlik üçün ərazidə fövqəladə vəziyyət elan edib.
