ABŞ Dövlət Departamenti Azərbaycan və Ermənistan arasında davam edən danışıqlardan məmnunluğunu ifadə edib.
Busaat.az xəbər verir ki, ABŞ Dövlət Departamentinin sözçüsü Mett Miller Ermənistan və Azərbaycan liderlərinin iyunun 1-də Moldovanın paytaxtı Kişinyovda keçiriləcək Avropa Siyasi Birliyinin Sammitində görüş planı ilə bağlı yazılı açıqlama verib.
Miller açıqlamasında qeyd edib: “Ermənistan və Azərbaycan arasında danışıqların davam etdiyini görməkdən məmnunuq. Xarici işlər naziri (Antoni) Blinkenin dediyi kimi, Cənubi Qafqazda sülh mümkündür. Bu yaxınlarda biz Nikol Paşinyana sülhə sadiqliyinə görə və İlham Əliyevə amnistiya qərarı ilə bağlı son addımlarına görə minnətdarlığımızı bildirdik”.
İlham Əliyev və Paşinyanın Kişinyovda Avropa liderləri ilə də görüşəcəyini xatırladan Miller bildirib: “Ümid edirik ki, bu görüş məsələlərin zorakılıqla deyil, danışıqlar masası arxasında həllində səmərəli addım olacaq. Aqressiv ritorika yalnız keçmiş zorakılığı davam etdirə bilər”.
Miller vurğulayıb ki, Birləşmiş Ştatlar davamlı sülh sazişinin əldə edilməsi üçün hər iki tərəfin səylərini dəstəkləməyə hazırdır.
Busaat.az
