ABŞ hökuməti “Şimal axını 1” və “Şimal axını 2” boru kəmərlərindəki partlayışlarla bağlı onların rolu olmadığına heç kimin inanmadığını başa düşür.
Busaat.az xəbər verir ki, bu sözləri Rusiya Xarici İşlər Nazirliyinin sözçüsü Mariya Zaxarova bildirib.
“ABŞ-lilər iddia edirlər ki, “Şimal axını” boru kəmərlərində baş verən partlayışlarla heç bir əlaqələri olmayıb, baxmayaraq ki tanınmış araşdırmaçı müxbir Seymur Herşin tapıntıları geniş şəkildə əlçatandır. Onlar başa düşürlər ki, hamı bunun yalan olduğunu anlayır”, – deyə Zaxarova Telegram kanalında yazıb.
“Problem sadəcə ABŞ-nin yalan danışmasıdır. Mən sizə ABŞ-nin keçmiş dövlət katibi Kolin Pauellin flakon fırıldaqları haqqında danışa bilərəm, amma bu hekayədən bezmisinizsə, məndə çoxlu başqa hekayələr var”, – deyə Zaxarova davam edib.
Diplomat nümunə kimi ABŞ-nin onilliklər ərzində işğalı altında qalan Haiti Respublikasındakı vəziyyəti göstərib:
“İndi isə ABŞ-nin real yardımı haqqında bir neçə kəlmə deyək. 2010-cu ildə adada dəhşətli zəlzələ baş verdi, yüz minlərlə insan həlak oldu; ölənlər və yaralananlar da daxil olmaqla, qurbanların ümumi sayı yarım milyonu ötdü. ABŞ 380 milyon dollar ayırdı. Bu sizə çox görünürmü? Lakin ABŞ-də prezident seçkiləri bundan 15 dəfə baha başa gəlir”.
Zaxarova, həmçinin 2021-ci ildə Haiti prezidenti Jovenel Moise sui-qəsdi və Venesuela prezidenti Nikolas Maduroya qarşı uğursuz sui-qəsd cəhdlərini də xatırladıb:
“Bu, Kiyevin mərkəzində Co Baydeni belə məhəbbətlə qucaqlayan Zelenski üçün çox düşündürücü hekayədir. İnsan öz xalqına nə qədər nifrət etməlidir ki, özləri üçün Haiti ilə eyni perspektivi nəzərdən keçirsinlər?”.
Busaat.az
