ABŞ İsraili tərk etmək istəyən vətəndaşları üçün çarter reysləri təşkil edəcək.
Busaat.az xəbər verir ki, bu barədə ABŞ Dövlət Departamentinin sözçüsü Metyu Miller açıqlamasında bildirib.
O, nazirliyin ən mühüm prioriteti xaricdəki vətəndaşlarının təhlükəsizliyi olduğunu söyləyib.
Miller bildirib ki, bu gündən etibarən ABŞ vətəndaşları və onların İsraildəki birinci dərəcəli qohumları üçün çarter reysləri təşkil edilməyə başlanılacaq.
Önümüzdəki günlərdə uçuşların həyata keçiriləcəyi ərazilərin artırılacağını qeyd edən Miller, Dövlət Departamentinin bir çox yüksək səviyyəli rəsmisinin ABŞ vətəndaşlarının İsraildən çıxarılması istiqamətində daha çox seçim təmin etmək üçün hava yolu şirkətləri və beynəlxalq tərəfdaşlarla birlikdə çalışdıqlarını ifadə edib.
Sözçü deyib ki, vətəndaşlar təyin olunmuş məntəqələrdən öz səyahət planlarını tərtib edə bilərlər, köməyə ehtiyacı olanlar isə Xarici İşlər Nazirliyinin internet səhifəsindəki formanı doldurmalıdırlar.
İsraildəki hadisələri yaxından izlədiklərini ifadə edən Miller, hər həftə minlərlə ABŞ vətəndaşının təhlükəsiz şəkildə ölkədən çıxarılmasını gözlədiklərini vurğulayıb.
ABŞ İsrail və işğal altındakı İordan çayının qərb sahili üçün səyahət xəbərdarlığını 3-cü səviyyəyə qaldırıb. Həmçinin, vətəndaşlarına lazım olmadıqca bu bölgələrə səyahət etməmələri barədə xəbərdarlıq edib.
