ABŞ Kiyevə yeni hərbi yardım paketi ayırıb

 ABŞ Ukrayna üçün yeni hərbi yardım nəzərdə tutub. Yeni hərbi yardım paketinə 200 Humvee avtomobili, HIMARS raketləri üçün sursat, tank əleyhinə sistemlər və mərmilər də daxil olacaq.

Busaat.az xəbər verir ki, bu barədə ABŞ Müdafiə Nazirliyi (Pentaqon) məlumat yayıb.

Məlumata əsasən, 725 milyon dollar dəyərində olan hərbi yardım paketinə HİMARS raketləri üçün əlavə döyüş sursatı, 23 000 155 mm artilleriya mərmisi və 500 dəqiq idarə olunan 155 mm artilleriya mərmisi daxildir.

Bundan əlavə, ABŞ Ukrayna silahlı qüvvələrinə 5000 tank əleyhinə silah, HARM raketləri, atıcı silahlar, digər silahlar və tibbi ləvazimatlar verəcək.

Pentaqon Vaşinqtonun 2021-ci ilin Yanvar ayından etibarən Kiyevə ümumilikdə 18,2 milyard dollar dəyərində silah tədarük etməyi öhdəsinə götürdüyünü bəyan edib.

Qeyd edək ki, ABŞ prezidenti Coe Bayden Ukraynaya 725 milyon dollara qədər əlavə hərbi yardım ayırmağı əmr edib.

Busaat.az