ABŞ Minuteman III raketini sınaqdan keçirib

ABŞ Hərbi Hava Qüvvələri döyüş başlığı olmayan Minuteman III raketini buraxdığını açıqlayıb.

Busaat.az xəbər verir ki, komandanlıqdan verilən yazılı açıqlamaya görə,  ballistik raket fevralın 9-da Kaliforniyadakı Vandenberq Kosmik Qüvvələri bazasından atılıb.

Açıqlamada raketin nüvə başlığı daşımadığı və qitələrarası ballistik raketlərin atmosferdən çıxdıqdan sonra geri qayıtmasına imkan verən sınaq  testi üçün buraxıldığı qeyd edilib.

Həmçinin, açıqlamada bu sınağın ABŞ-ın nüvə çəkindiriciliyini nümayiş etdirməyə yönəlmiş rutin və dövri fəaliyyətlərin bir hissəsi olduğu bildirilib.  “Belə sınaqlar 300 dəfədən çox həyata keçirilib və bu sınaq dünyada baş verən hadisələrlə əlaqəli deyil”, – deyə vurğulanıb.

Qeyd edək ki,  raketin 4200 mil (6759 km) qət etdiyi və Marşal adalarındakı Kvajalein Atolluna düşdüyü bildirilib.

Busaat.az