ABŞ prezidenti Co Bayden G7 Liderlər Sammitinə ev sahibliyi edəcək Yaponiyanın Xirosima şəhərinə gələrək Yaponiyanın baş naziri Fumio Kişida ilə görüşüb.
Busaat.az xəbər verir ki, bu barədə Yaponiya Xarici İşlər Nazirliyi bəyanat yayıb.
Bəyanatda deyilir: “İki lider Hind-Sakit Okean regionunda, xüsusən də Şərqi Asiyada status-kvonu güc yolu ilə dəyişdirmək üçün hər hansı birtərəfli cəhdə yol verilməməsi əsasında regional məsələlərlə bağlı fikir mübadiləsi aparıblar”.
G7 sammitinin keçiriləcəyi Xirosima şəhəri İkinci Dünya Müharibəsi zamanı ABŞ-nin 6 avqust 1945-ci ildə atdığı atom bombası nəticəsində dağıdılıb.
Bəyanatda aşağıdakı ifadələr də yer alıb:
“İki lider Çinlə problemlərin həllində yaxından işləməyə davam etmək barədə razılığa gəliblər. İki lider, həmçinin Çin ilə ümumi çağırışlar üzrə əməkdaşlığın vacibliyini bir daha təsdiqləyiblər. Bundan əlavə, onlar Tayvan boğazı boyunca sülh və sabitliyin vacibliyini bir daha vurğulayıblar və boğazlararası problemlərin sülh yolu ilə həllini təşviq ediblər”.
Busaat.az
