İsraildə mübahisəli məhkəmə tənzimləməsi təxirə salındıqdan sonra küçələrdə gərginlik azalıb. Lakin ABŞ və İsraildən qarşılıqlı sərt bəyanatlar gəlməkdədir.
Busaat.az xəbər verir ki, İsrailin baş naziri Benyamin Netanyahu ABŞ prezidenti Co Baydenin, “bu yola davam edə bilməzlər”, – açıqlamasına münasibət bildirib.
“İsrail xarici təzyiqlərə əsaslanaraq qərarlar verən ölkə deyil”, – Netanyahu deyib.
Xatırladaq ki, “Netanyahu administrasiyası bu yola davam edə bilməz”, – deyə Bayden bildirib.
Baş nazir sosial media hesabından ABŞ prezidentinin açıqlamalarına reaksiya verib:
“İsrail suveren ölkədir və qərarlarını kənardan, o cümlədən ən yaxşı dostlarından gələn təzyiqlə deyil, öz xalqının iradəsi ilə verir”.
İsrailin ifrat sağçı Milli Təhlükəsizlik Naziri İtamar Ben-Qvir də Baydenin açıqlamlarını şərh edərkən deyib: “İsrail ABŞ bayrağındakı ulduzlardan biri deyil”.
Sabiq müdafiə naziri Benni Qantz isə Baydenin bəyanatının İsrail hökumətinə xəbərdarlıq mesajı olduğunu bildirib.
Qeyd edək ki, qanun layihəsinin geri götürülməsini xahiş edən İsrail prezidenti Hersoq danışıqların ikinci günündə müxalifət nümayəndələri ilə görüşüb.
Busaat.az
