ABŞ-nin milli təhlükəsizlik üzrə müşaviri Jake Sullivan Səudiyyə Ərəbistanının Ciddə şəhərində vəliəhd şahzadə Məhəmməd bin Salman da daxil olmaqla, Səudiyyə rəsmiləri ilə regional və ikitərəfli məsələləri müzakirə edib.
Busaat.az xəbər verir ki, bu barədə Ağ Evdən verilən yazılı açıqlamada bildirilib.
Məlumata görə, Sullivan Səudiyyə Ərəbistanı vəliəhdi və baş naziri Məhəmməd bin Salman, eləcə də yüksək səviyyəli Səudiyyə rəsmiləri ilə görüşmək üçün bu gün Ciddəyə səfər edib.
Sullivan bin Salman və Səudiyyə rəsmiləri ilə regional məsələləri, o cümlədən “dünya ilə əlaqəli daha dinc, təhlükəsiz, firavan və sabit Yaxın Şərq regionu üçün ortaq baxışı inkişaf etdirmək təşəbbüslərini” müzakirə edib.
Görüş zamanı Yəməndə davam edən atəşkəsdən sonra baş verən hadisələrin də müzakirə edildiyi bildirilib və Sullivanın BMT-nin liderliyində müharibənin sona çatması üçün davam edən səyləri müsbət qarşıladığı vurğulanıb.
Sonda tərəflər müzakirə olunan məsələlərlə bağlı mütəmadi məsləhətləşmələr aparmaq barədə razılığa gəliblər.
Busaat.az
