Aİ “rəqəmsal sürücülük vəsiqəsi”nə keçməyə hazırlaşır

Avropa İttifaqı (Aİ) avtomobil sürücüləri üçün sürücülük vəsiqələrinin rəqəmsallaşdırılması ilə bağlı yeni təklif hazırlayıb.

Busaat.az xəbər verir ki, nəqliyyatdan məsul komissar Adina Valean Aİ Komissiyası üzvlərinin yol təhlükəsizliyi ilə bağlı keçirilən iclasdan sonra hazırlanan təklifləri açıqlayıb.

Təkliflər arasında dünyada ilk dəfə tətbiq olunacağı bildirilən “rəqəmsal sürücülük vəsiqəsi”nə keçid də var.

Rəqəmsal lisenziyalar mövcud olduqda, onlara mobil telefondan və ya digər rəqəmsal cihazdan daxil olmaq mümkün olacaq və bu vəsiqələr bütün Aİ-də etibarlı olacaq. Aİ daxilində sürücülük vəsiqələrinin rəqəmsallaşdırılması üçün minimum tələblər daha sonra müəyyənləşdiriləcək.

Uyğunlaşdırma prosesindən sonra isə lisenziyalar tamamilə rəqəmsal sistemə keçəcək.

Rəqəmsal sürücülük vəsiqəsinə keçid üçün 4 il müddət nəzərdə tutulub.

Qeyd edək ki, təklifin qanuna çevrilməsi üçün o, üzv dövlətlər və Avropa Parlamenti tərəfindən də qəbul edilməlidir.

Busaat.az