Bundesverin inventarındakı boşluqlar qısa müddətdə doldurulmayacaq. Pistorius çatışmazlığın Ukraynaya avadanlıqların tədarükü ilə bağlı olduğunu bildirərək, inventarın yenilənməsinin 2030-cu ilə qədər davam edə biləcəyi barədə xəbərdarlıq edib.
Busaat.az xəbər verir ki, bu barədə Almaniyanın Das Erste xəbər portalı Almaniya Müdafiə Naziri Boris Pistoriusa istinadən məlumat verib.
Boris Pistoriusun sözlərinə görə, yenilənmə prosesi 2030-cu ilə qədər təxirə salına bilər, ona görə də nazirlik öz prioritetlərini müəyyən etməlidir. Pistorius qeyd edib ki, bu prioritetlərdən biri NATO-nun şərq cinahının qorunmasıdır.
Pistorius 2025-ci ilə qədər Bundesverin müdafiə büdcəsinin ÜDM-in 2%-nə qədər artırılacağını açıqlayıb.
Pistorius Almaniyanın 2024-cü ildə Hind-Sakit okean bölgəsinə yenidən döyüş gəmiləri göndərəcəyini, ölkəsinin Yaponiya, Avstraliya, Hindistan, Cənubi Koreya, İndoneziya və Sinqapur kimi regionun əsas ölkələri ilə əməkdaşlığı gücləndirəcəyini bildirib.
Alman İqtisadiyyat İnstitutunun (IW) hesablamalarına görə, Olaf Şolz-un vəd etdiyi əlavə maliyyədən istifadə edilərsə, Almaniyanın müdafiə xərcləri 2024 və 2025-ci illərdə ÜDM-in 2%-nə çata bilər.
Busaat.az
