Almaniya NATO-nun yüksək hazırlıqlı qüvvələrinə rəhbərlik edəcək

Almaniya yanvarın 1-dən etibarən alyansın Yüksək Hazırlıq Qüvvələrinin bir hissəsi olan 11500 nəfərlik NATO-nun Çox Yüksək Hazırlıqlı Birgə İşçi Qrupuna rəhbərlik edəcək.

Busaat.az xəbər verir ki, bu barədə NATO-nun Mətbuat Xidməti məlumat yayıb.

“Bazar günündən etibarən (1 yanvar 2023-cü il) Almaniya bir neçə gün ərzində yerləşdirməyə hazır olan NATO-nun ən yüksək hazırlıqlı hərbi qüvvələrinə rəhbərlik edəcək” – deyə, bəyanatda qeyd edilib.

NATO-nun mənzil-qərargahı xatırladıb ki, yüksək hazırlıq qruplaşması 2014-cü ildə Krımın Rusiyaya birləşdirilməsi və Ukraynanın şərqində hərbi əməliyyatların başlanmasına cavab olaraq NATO-nun Çevik Reaksiya Qüvvələrinin tərkibində yaradılıb.

NATO sözçüsü Oana Lungesku bildirib ki, bu addım alyansın “Müttəfiqlərin ərazisinin hər qarışını qorumaq və müdafiə etmək” niyyətindən xəbər verir.

NATO-nun Çox Yüksək Hazırlıqlı Birgə İşçi Qrupu NATO-ya üzv dövlətlərin bu məqsədlə bir il müddətinə təyin edilmiş bölmələrindən rotasiya əsasında formalaşır. 2023-cü ildə Almaniyanın 37-ci Tank və Qrenadier Briqadası bu qüvvələrin əsasını təşkil edəcək. Almaniyadan başqa, səkkiz ittifaq ölkəsi bu qrupa qoşun verir ki, həmin ölkələr bunlardır: Belçika, Çexiya, Latviya, Litva, Lüksemburq, Hollandiya, Norveç və Sloveniya.

Busaat.az