Almaniya Pekindən imtina edir? – Yeni Çin siyasəti açıqlandı

Çin Kommunist Partiyasının son qurultayının nəticələrindən sonra Almaniya Çinlə münasibətləri dəyişməlidir.

Busaat.az xəbər verir ki, bu barədə Almaniya kansleri Olaf Şolz bəyanatla çıxış edib.

Almaniya kansleri Olaf Şolz Çinə rəsmi səfərindən əvvəl yeni Çin siyasətini açıqlayıb. Şolz Frankfurter Allgemeine Zeitung üçün yazdığı məqalədə qeyd edib ki, Çin Kommunist Partiyasının son qurultayının nəticələri onun ölkəsinin Çinlə münasibətləri dəyişməli olduğunu göstərib.

Marksizm-Leninizmə bağlılığın əvvəlki partiya qurultaylarına nisbətən daha çox yer aldığını xatırladan Şolz bildirib: “Çin on il əvvəlki Çin deyil. Çin dəyişsə, aydındır ki, bizim Çinlə də münasibətlərimiz dəyişməlidir”.

Almaniya kansleri Çin administrasiyası ilə apardığı danışıqlarda “çətin məsələləri” görməzdən gəlmək istəmədiyini vurğulayaraq, “Bura, məsələn, Sincandakı vətəndaş və siyasi azadlıqlara və etnik azlıqların hüquqlarına hörmət daxildir. Tayvan ətrafındakı ümumi gərgin vəziyyətdən narahatıq. ABŞ və bir çox başqa ölkələr kimi biz də “Vahid Çin” siyasətini dəstəkləyirik. Amma bu o deməkdir ki, status-kvo yalnız sülh yolu ilə və qarşılıqlı razılıq əsasında dəyişdirilə bilər” – deyə, əlavə edib.

Almaniyanın Çin siyasətinin ancaq Avropanın Çin siyasətiylə inteqrasiyası şəklində uğurlu ola biləcəyini qeyd edən Şolz, bu səbəbdən səfəri öncəsi Fransa prezidenti Emmanuel Makron da daxil olmaqla avropalı tərəfdaşlar və transatlantik dostlarla sıx koordinasiyada olduqlarını bildirib.

Busaat.az