Almaniyanın Ukraynaya “Patriot” hava hücumundan müdafiə sistemi və “Marder” tipli zirehli döyüş maşınları verəcəyi açıqlanıb.
Busaat.az xəbər verir ki, Almaniya baş nazirliyindən verilən yazılı açıqlamada, kansler Olaf Şolzun ABŞ prezidenti Co Bayden ilə telefon danışığında ölkəsinin Ukraynaya “Patriot” hava müdafiə sistemi və “Marder” tipli zirehli döyüş maşınları verəcəyini ifadə etdiyi bildirilib.
Bəyanatda deyilir ki, iki lider Rusiyanın Ukraynaya qarşı apardığı işğalçılıq müharibəsi ilə bağlı fikir mübadiləsi aparıb və Ukraynanın müstəqilliyi, ərazi bütövlüyü və suverenliyini dəstəklədiklərini bir daha bəyan ediblər.
ABŞ prezidenti Bayden və kansler Şolz lazım olduğu müddətcə Ukraynaya maliyyə, humanitar, hərbi və diplomatik dəstəyi verməkdə qərarlı olduqlarını ifadə edib.
Bəyanatda prezident Bayden və kansler Şolz digər müttəfiqlər və tərəfdaşlar tərəfindən Ukraynaya verilən hərbi dəstəkdən məmnun olduqlarını bildiriblər.
Busaat.az
