Avropa Birliyi Türkiyəyə başsağlığı verib

Avropa İttifaqı Şurasının sədri Şarl Mişel Türkiyədə  baş verən “əsrin fəlakəti” olaraq xarakterizə edilən zəlzələdə həyatını itirənlərə görə Türkiyəyə başsağlığı verib.

Busaat.az xəbər verir ki, o, Avropa İttifaqının bütün imkanlarını səfərbər etməyə hazır olduqlarını bildirib.

Mişel Türkiyə və Suriyada həyatını itirənlərə başsağlığı verərək, “Aİ və üzv dövlətlər olaraq zəlzələdən zərər çəkənlərə, axtarış-xilasetmə işlərinə dəstək olmaq əzmində olduğumuzu ifadə etmək istərdim”, – deyə bildirib.

O,  bütün AB ölkələrinin liderlərinin imzaladığı məktubda Prezident Ərdoğana zəlzələ qurbanlarına kömək üçün bütün imkanlarını səfərbər etməyə hazır olduqlarını vurğulayıb.

Mişel, həmçinin zəlzələdən zərərçəkənlərə kömək məqsədilə Brüsseldə donorlar konfransı təşkil edəcəklərini də bildirib.

Qeyd edək ki, Aİ ölkələrinin liderləri Brüsseldəki zirvə toplantısına zəlzələlərdə həyatını itirənlər üçün bir dəqiqəlik sükutla başlayıb.

Busaat.az