Avstriyanın daxili işlər naziri Gerhard Karner Çin sosial media platforması TikTok-un “təhlükəsizlik narahatlıqları” səbəbiylə federal səviyyədə dövlət işçiləri tərəfindən korporativ mobil telefonlarda istifadəsinin qadağan edildiyini açıqlayıb.
Busaat.az xəbər verir ki, Avstriyanın daxili işlər naziri Karner mətbuata verdiyi açıqlamada, Daxili İşlər Nazirliyinin nəzdində yaradılmış ekspert komitəsinin fevral ayından bəri TikTok tətbiqi ilə bağlı araşdırmalarına uyğun olaraq aldığı qərarı ictimaiyyətlə bölüşüb.
Dövlət məmurlarının TikTok-dan şəxsi cihazlarında istifadə edə biləcəyini qeyd edən Karner, bu tətbiqin federal səviyyədə rəsmi cib telefonlarında istifadəsinin qadağan edildiyini və sözügedən tətbiqin Çin dövlətinə aid olduğunu, bunun da informasiya və məlumatlarla bağlı müxtəlif narahatlıqlar doğurduğunu bildirib.
Federal hökumətlə yanaşı, Yuxarı Avstriya əyaləti də oxşar səbəblərdən öz işçilərinin korporativ mobil telefonlarında TikTok-dan istifadəni qadağan edib.
ABŞ və Avropanın bir çox ölkəsi Çin sosial media platforması TikTok-un dövlət işçilərinə məxsus rəsmi cihazlarda istifadəsini qadağan edib.
Busaat.az
