Dünyanın aparıcı media qurumlarından olan Britaniyanın BBC kanalında cinsi qısnama, fahişəlik və pedofiliya ittihamlarının mərkəzində olan ekran simasının adı açıqlanıb.
Busaat.az xəbər verir ki, İngiltərə, son günlər bir-birinin ardınca ifşa olunan BBC-nin ekran üzünü müzakirə edir.
Dünən gecə məşhur aparıcı Huv Edvardsın həyat yoldaşı Viki Flind, ərinin adının bu qalmaqalda hallandığını söyləyib.
Flind həyat yoldaşının xəstəxanada müalicə aldığını desə də, 61 yaşlı Edvards haqqında yeni iddialar ortaya çıxıb. İngilis mediasında yer alan xəbərlərdə Edvardsın onunla işləyən təcrübəsiz televiziya işçilərinə yaraşmayan hərəkətlər etdiyi və cinsi mesajlar göndərərək “əlində olan gücdən istifadə etdiyi” ifadə edilib.
“Hazırda həyat yoldaşım xəstəxanadadır və ailəmiz son bir neçə gündə çox çətin günlər keçirdi. Mən bu bəyanatı onun ağlını qorumaq və övladlarımı qorumaq üçün verirəm. Onun ciddi psixi problemi var”, – Edvardsın həyat yoldaşı deyib.
Bir neçə ildir depressiyaya düşdüyü öyrənilən Edvardsın son günlər vəziyyətinin pisləşdiyi bildirilib.
Ekran qarşısında sakit davranışı ilə tanınan Edvards BBC News-un ən çox qazanan adamı idi. Huvun ildə 435 min funt qazandığı vurğulanıb.
Busaat.az
