“Microsoft” şirkətinin təsisçisi, amerikalı milyarder Bill Qeytsin sərvətinin böyük hissəsi Afrika üçün xərclənəcək.
Busaat.az xarici mediaya istinadən xəbər verir ki, milyarder bu barədə Efiopiyanın paytaxtı Əddis-Əbəbədə Afrika İttifaqının Baş Qərargahında çıxışı zamanı danışıb.
“Bu yaxınlarda sərvətimin növbəti 20 il ərzində paylanacağını vəd etmişəm. Bu vəsaitlərin əsas hissəsi burada, Afrikada problemlərin həlli məqsədilə xərclənəcək”, – deyə Qeyts qeyd edib.
Onun sözlərinə görə, məbləğ Bill və Melinda Qeyts Xeyriyyə Fondu vasitəsilə Afrikaya yönləndiriləcək.
Yazda isə B.Qeyts bildirmişdi ki, sözügedən fond 2045-ci ilə qədər müxtəlif layihələrin maliyyələşdirilməsinə 200 milyard dollar ayıracaq.
Xatırladaq ki, 69 yaşlı milyarder hazırda planetin ən varlı şəxsləri siyahısında beşinci pillədədir. Onun şəxsi sərvəti 175 milyard dollar olaraq qiymətləndirilir.
