Blinken qarşıdakı səfərində Çinlə əməkdaşlığı genişləndirməyi planlaşdırır

ABŞ-ın dövlət katibi Antoni Blinken gələn il Çinə səfəri zamanı Pekinlə əməkdaşlığı genişləndirməyi və iki ölkə arasında əlaqələrin sabitləşməsinə yönəlmiş danışıqları inkişaf etdirməyi planlaşdırır.

Busaat.az xəbər verir ki, bu barədə məlumatı Kyodo agentliyi yayıb.

Məlumata görə, ABŞ dövlət katibinin Şərqi Asiya və Sakit Okean ölkələri ilə əlaqələr üzrə köməkçisi Daniel Kritenbrink müsahibəsində Blinkenin səfəri zamanı Çinlə əlaqələri möhkəmləndirməyi hədəflədiyini bildirib.

“Ümid edirik ki, bu səfər aramızdakı rəqabəti şüurlu şəkildə idarə etməyə və ya münasibətləri sabitləşdirmək üçün zəmin yaratmağa kömək edəcək” – deyə, Kritenbrink qeyd edib.

ABŞ rəhbərliyinin üç əsas qayda əsasında Çinə yanaşmasını davam etdirəcəyini bildirən Kritenbrink bu qaydaları belə sıralayıb: “Daxili gücə sərmayə qoymaq, regional və qlobal qaydalara əsaslanan nizamı dəstəkləmək üçün müttəfiqlər və tərəfdaşlarla əməkdaşlığı davam etdirmək, anlaşmazlıq yaranmadan Çinlə rəqabət aparmaq.”

Kritenbrink, həmçinin, Tokio və Seulun daxil olduğu üçtərəfli əməkdaşlığın görünməmiş səviyyəyə çatdığını bildirib.

Şimali Koreyanın daha çox raket sınaqları keçirəcəyi təqdirdə sərt cavab veriləcəyi barədə xəbərdarlıq edən Kritenbrink, Şimali Koreya ilə diplomatik həll yollarına açıq olduqlarını da xatırladıb.