BMT buna görə Twitter-i qınayıb

Birləşmiş Millətlər Təşkilatı (BMT) Elon Mask tərəfindən alındıqdan sonra Twitter-də “irqçi terminologiyadan istifadənin artması”nı qınayıb və bu platformada afrikalılara qarşı istifadə edilən nifrət ifadələri ilə bağlı “dərin sosial media məsuliyyətinin” lazım olduğunu bildirib.

Busaat.az xəbər verir ki, BMT-dən verilən yazılı açıqlamaya görə, BMT ekspertləri Maskın sosial şəbəkəni almasından sonra Twitter-də qaradərililəri təsvir etmək üçün irqçi sözdən istifadənin əhəmiyyətli dərəcədə artmasına reaksiya verib.

“Rutgers Universiteti tərəfindən aparılan araşdırmalar göstərdi ki, Twitter satıldıqdan sonra ilk günlərdə qaradərili insanlara qarşı nifrət və irqçi sözlərin istifadəsi əvvəlki orta göstəricilərlə müqayisədə 12 saat ərzində 500 faiz artıb. Twitter bunun “trolling” kampaniyasına əsaslandığını və bu platformada nifrət dilinə yer olmadığını bildirsə də, afrikalılara qarşı istifadə edilən nifrət dili son dərəcə narahatedicidir. Bu ritorika insan hüquqlarına əsaslanan reaksiyaya layiqdir” – deyə, BMT-dən bildirilib.

BMT-nin İnsan Haqları üzrə Ali Komissarı Volker Türk Maska məktub göndərərək, ifadə azadlığının zərərli dezinformasiyaların yayılmasına yardımçı olmamalı olduğunu vurğulayıb.

BMT ekspertləri Elon Mask, Mark Zukerberq, Sundar Pichai, Tim Cook və digər sosial media platformalarının baş direktorlarını iş modellərinin mərkəzinə insan hüquqları, irqi ədalət, hesabatlılıq, şəffaflıq, sosial məsuliyyət və etikanı qoymağa çağırıblar.

Busaat.az