Bolqarıstan nüvə yanacağı ehtiyaclarını Rusiyadan kənar qarşılayacaq

Bolqarıstanın atom elektrik stansiyası ABŞ-ın Westinghouse Electric şirkəti ilə nüvə yanacağı almaq barədə razılığa gəlib.

Busaat.az xəbər verir ki, enerji təchizatını diversifikasiya etməyi hədəfləyən və Bolqarıstanın yeganə atom elektrik stansiyası olan Kozloduy, ABŞ-ın Westinghouse Electric şirkətinin İsveç filialı ilə nüvə yanacağı almaq üçün müqavilə imzalayıb.

Bolqarıstanın energetika naziri Rossen Xirstov qeyd edib ki, ABŞ şirkəti ilə 10 illik razılaşma nüvə yanacağının alınmasının qeyri-müəyyən dövrlərdə normal qalmasına imkan verəcək. Elektrik stansiyasının 6-cı blokunun yanacaqla təmin olunması üçün Fransanın “Framatome” şirkəti ilə də analoji razılaşmanın imzalanacağını deyən nazir Xirstov müqavilənin hazırlıq mərhələsində olduğunu bildirib.

Xirstov, Framatome ilə ölkənin enerji ehtiyacları üçün Rusiyadan başqa iki mənbənin təmin ediləcəyini və enerji təchizatının “tam müxtəlifliyi və təhlükəsizliyinin” təmin edilməsi prosesinin tamamlanacağını bildirib.

Qeyd edək ki, Kozloduy Atom Elektrik Stansiyası daha əvvəl Bolqarıstanın elektrik enerjisinə ehtiyacının üçdə birini Rusiyanın Rosatom firmasından alırdı.

Rusiya qazından və nüvə yanacağından asılı olan Bolqarıstan Rusiya-Ukrayna müharibəsindən sonra enerji təchizatını diversifikasiya etmək qərarına gəlib.