Boris Consondan Ukrayna çağırışı: "Lazım olanı verin"

Böyük Britaniyanın keçmiş baş naziri Boris Conson Ukraynaya istənilən yardımın, o cümlədən tanklar, artilleriya sistemləri və döyüş təyyarələrinin Qərb tərəfindən verilməli olduğunu müdafiə edib.

Busaat.az xəbər verir ki, Conson Vaşinqtonda beyin mərkəzi olan Atlantic Council-da Qərbin Ukraynaya verdiyi dəstək və Rusiyaya qarşı atıla biləcək addımları barədə çıxış edib.

ABŞ-ın Ukraynaya verdiyi dəstəyin çox əhəmiyyətli olduğuna diqqət çəkən Conson, “ABŞ-ın dəstəyi olmasaydı, Rusiya prezidenti Vladimir Putin Ukraynada “kukla hökumət” qurar və digər ölkələrə də nüfuz edərdi. Beləcə, dağılmış Sovet İttifaqı Avropa demokratiyasına kölgə sala bilərdi”, – deyə qeyd edib.

Conson Qərb ittifaqına müraciət edərək, Ukraynaya tanklar, artilleriya sistemləri və döyüş təyyarələri də daxil olmaqla bütün yardımların göstərilməli olduğunu müdafiə edib.

Putinin Ukraynaya hücum edərək “yanlış hesablama” etdiyini iddia edən Conson deyib: “Putin dəli deyil, xəstə deyil. O, sadəcə olaraq tarixi səhvə yol verib. Nüvə silahlarından da istifadə etməyəcək, çünki bu, Çinin onlara verdiyi dəstəyin son qığılcımını söndürəcək”.

Heç kəsin, o cümlədən öz xalqının və dünyadakı tərəfdarlarının Rusiyanın nüvə silahı istifadəsinə dəstək verməyəcəyini ifadə edən Conson, “neo-imperialist” olaraq xarakterizə etdiyi Putinin Sovet İttifaqının dağılmasına görə “qisas almaq” istədiyini bildirib.