Braziliyanın Blumenau şəhərində uşaq bağçasına edilən hücumda ilkin məlumata görə 4 uşaq həyatını itirib, 4 uşaq isə yaralanıb.
Busaat.az-ın məlumatına görə, “Reuters” yerli polis və xəstəxana rəsmilərinə istinadən xəbər verir ki, Santa Katarina ştatında hücumu həyata keçirən 25 yaşlı kişi şübhəli təslim olub və saxlanılıb.
Polis şefi Marcio Alberto Filippinin açıqlamasına görə, 3 ilə 5 yaşlarında olan 4 yaralı uşaq xəstəxanada müalicə olunur.
BBC isə cinayətkarın yerli vaxtla səhər saat 9:00 radələrində uşaq bağçasına balta ilə hücum etdiyini bildirib. Yanğınsöndürənlərin paylaşdığı məlumata görə, hücum zamanı uşaq bağçasında 40 şagird olub. Yerli təhlükəsizlik rəisi Filippi cinayətkarın məktəbin divarlarına dırmaşaraq içəri girdiyini bildirib.
Sosial media hesabında hücumla bağlı açıqlama verən Braziliya prezidenti Luiz İnasio Lula da Silva hücumu “dəhşətli” adlandırıb və bunun “qəbuledilməz, absurd nifrət və qorxaqlıq hərəkəti” olduğunu bildirib.
