Böyük Britaniyanın Baş naziri Kir Starmer ABŞ-Britaniya hərbi bazasının yerləşdiyi, Hind okeanındakı Çaqos arxipelaqı üzərində suverenliyin Mavrikiyə verilməsi ilə bağlı saziş imzalayıb.
Busaat.az Report.az-a istinadən xəbər verir ki, bu barədə “Sky News” məlumat yayıb.
“İndi və bizim şərtlərlə bu razılaşmaya gedərək bazamızın növbəti əsrdə də işini yaxşı səviyyədə davam etdirəcək möhkəm təhlükəsizliyini təmin edirik”, – Starmer mətbuat konfransında deyib.
Razılaşmanın şərtlərinə görə, Britaniya Dieqo Qarsiya hərbi bazasının istismarına görə 99 il ərzində Mavrikiyə hər il orta hesabla 101 milyon funt sterlinq ödəyəcək. Eyni zamanda, Starmer bütün sövdələşmənin təxminən 3,4 milyard funta başa gələcəyini söyləyib.
Baş nazirin sözlərinə görə, London razılığa gəlməsəydi, Mavriki hökuməti işi beynəlxalq məhkəmələrə daşıyacaq və böyük ehtimalla qalib gələcəkdi.
Xatırladaq ki, 2024-cü ilin oktyabrında uzun illər davam edən mübahisələrdən sonra Londonun Dieqo Qarsiya atolu da daxil olmaqla Çaqos üzərində suverenliyi Mavrikiyə verəcəyi, amma orada yerləşən hərbi bazanın azı 99 il Vaşinqton və Londonun yurisdiksiyasında qalacağı məlum olmuşdu. Lakin o zaman Britaniya hökuməti müqaviləni yenicə yekunlaşdırırdı. Mavrikidə keçirilən seçkilərdən sonra hökumət dəyişib: 2024-cü il noyabrın 13-dən Baş nazir Navinçandra Ramqulamın rəhbərlik etdiyi yeni hökumət hakimiyyətdədir.
