Qlobal enerji bazarlarında qeyri-müəyyənlik və dəyişkənliklər güclənərsə, britaniyalılar qışın müəyyən vaxtlarında elektrik enerjisinin kəsilməsi ilə üzləşə bilər.
Busaat.az “İnterfaks”a istinadən xəbər verir ki, bu barədə qaz və elektrik şəbəkələrinin operatoru “National Grid Plc” xəbərdarlıq edib. İngiltərə, Şotlandiya və Uelsdəki evləri elektrik enerjisi ilə təmin edən şirkətdən bildirilib ki, istehlakçılar üçün heç bir problem olmayacaq və işıqların kəsilməsi ehtimalı azdır. Bununla belə, qaz tədarükünün son dərəcə aşağı səviyyədə olacağı təqdirdə bu, ən pis ssenaridə mümkündür.
Eyni zamanda, məlumatda qarşıdan gələn qışın elektrik enerjisi təchizatçıları üçün gərgin keçəcəyi vurğulanıb, lakin operator riskə nəzarət etmək üçün əlavə planlar hazırlayıb.
Əlavə edək ki, “National Grid” qaz qıtlığı və başqa ölkələrdə istehsal problemləri səbəbindən Avropa ölkələrinin Böyük Britaniyaya elektrik enerjisi ixrac edə bilməyəcəyi ehtimalı barədə də xəbərdarlıq edib.
Busaat.az
