Ermənistanın baş naziri Nikol Paşinyan sabiq xarici işlər naziri Vardan Oskanyanı 2018-ci ildə Nazirlər Kabinetinin rəhbərinə təqdim etmək istədiyi təklifləri indi dərc etməyə çağırıb.
Busaat.az xəbər verir ki, bu barədə Paşinyan parlamentdə jurnalistlərə müsahibəsində bildirib.
“Qoy onlar öz variantlarını dərc etsinlər, mən onların katibi deyiləm. 2018-ci ildə təklif etmək istədikləri hər şeyi indi dərc etsinlər. Mən buna cavab verəcəm, çünki onların bütün təklifləri onların qoyduğu danışıqlar irsində tam əks olunub”, – Paşinyan deyib.
Baş nazir qeyd edib ki, 2018-ci ildən danışıqlar prosesinin şəffaf olmasına çalışır və danışıqlarda deyilənlərin hamısı xalqa çatdırılıb.
“Bu, çox ağrılı və mürəkkəb prosesdir”, – Paşinyan deyib.
Qeyd edək ki, Oskanyan baş nazirin onu tənqid etməsi ilə bağlı videomüraciət yayıb. O, bildirib ki, 2018-ci ildə Paşinyanla görüşmək imkanı olsaydı, ona masanın üzərində olan sənədə laqeyd yanaşmamağı və sıfırdan başlamamağı təklif edərdi, çünki bu, təhlükə ilə doludur.
Busaat.az
