ABŞ Mərkəzi Komandanlığı məlumat yayıb ki, Vaşinqton İsrail və İran arasında münaqişənin şiddətlənəcəyi təqdirdə müdaxiləyə hazır olmaq üçün Yaxın Şərqə beşinci nəsil “F-22” Raptor qırıcıları yerləşdirib.
Mövzunu Globalinfo.az-a şərh edən politoloq Turab Rzayev “F-22” Raptor qırıcılarının Yaxın Şərqə yerləşdirilməsinin gözlənilən odluğunu bildirib:
“ABŞ İsraili eskalasiyaya getməməyə, İrana açıq hücum etməməyə, həmçinin Qəzzadakı müharibəni dayandırmağa çağırır. Amma digər tərəfdən İsrailin təhlükəsizliyi ilə bağlı ABŞ-ın götürdüyü öhdəliklər var. Kritik məqamda fikir ayrılıqlarına, İsrail baş naziri Binyamin Netanyahu ilə bağlı narazılıqlara baxmayaraq rəsmi Vaşinqton İsraili qoruyacaq. Bunun səbəbləri isə müxtəlifdir.
ABŞ-ın geostrateji maraqları, Yaxın Şərqdə İsrailin Vaşinqtonu 100 faiz əmin olduğu yeganə bazası kimi görməsi, yəhudi lobbisinin ABŞ-da təsirləri, iki ölkə arasındakı mövcud əlaqələr və s. buna nümunədir”.
Politoloqun sözlərinə görə, bir müddət əvvəl də İran İsrailə qarşı dron və raket hücumları həyata keçirməyə cəhd edəndə ABŞ rəsmi Tehrana xəbərdarlıq etmişdi:
“İordaniyadan qalxan ABŞ qırıcıları və Kiprdən qalxan Britaniya qırıcıları İranın hücumunun qarşısını alaraq silahların 90 faizini məhv etmişdi.
Turab Rzayev
Çox az hissəsi də “Dəmir qübbə” sisteminə gəlib çatmışdı. İndi də eyni ssenarinin təkrarlanmasının şahidi ola bilərik. ABŞ İsrailə qarşı təhdidləri aradan qaldırmağa çağıracaq. Bununla bağlı İraq, Səudiyyə Ərəbistanı sərhədində müəyyən dislokasiyalar olunur”.
Turab Rzayev “F-22” qırıcılarının xüsusiyyətləri ilə bağlı da məlumat verib:
“Bu qırıcılar ABŞ aviasiya sənayesinin ən mükəmməl qırıcı təyyarələri, hava aparatları sayılır. “F-22” öz çevikliyi və manevr qabiliyyətinə, sürətinə görə “F-16”, F-35-dən daha təkmil silahlardır”.
