Bu gündən Finlandiya sarsılmaz təhlükəsizlik təminatı alacaq - Stoltenberq

Finlandiya NATO üzvü kimi alyansın təsis müqaviləsinin 5-ci maddəsi ilə “sarsılmaz təhlükəsizliyə” təminat verəcək.

Busaat.az xəbər verir ki, bu sözləri NATO-nun baş katibi Yens Stoltenberq bildirib.

Baş katib Brüsseldə keçirilən NATO Xarici İşlər Nazirləri Toplantısı öncəsi jurnalistlərin suallarını cavablandırıb.

İsveçdən fərqli olaraq Finlandiyanın NATO üzvü olmaqla hansı təhlükəsizlik təminatı alacağı sualına Stoltenberq belə cavab verib: “Finlandiya bundan sonra alyansın bütün hərbi və mülki strukturlarına daxil ediləcək“.

“Ən əsası odur ki, Finlandiya üzv olmaqla sarsılmaz təhlükəsizlik təminatı alacaq. Kollektiv müdafiəmizin “Hamı birimiz üçün, birimiz hamı üçün” mənasını verən 5-ci maddəsi bu gündən Finlandiyaya da şamil ediləcək”, – Stoltenberq deyib.

Busaat.az