Ukrayna prezidenti Vladimir Zelenski Rusiya ordusunun Ukraynanın Donetsk cəbhəsində ağır itkilər verməyə davam etdiyini iddia edib.
Busaat.az xəbər verir ki, bu barədə Zekenski gecə saatlarında Telegram hesabında paylaşdığı video mesajında deyib.
Rusiya qüvvələrinin xüsusilə Donetsk cəbhəsində irəliləməyə çalışdığını, lakin Ukrayna Ordusunun Rusiya hücumlarını uğurla dəf etməyə davam etdiyini qeyd edən Zelenski, “Cəbhədə vəziyyət ağırdır” – deyə, qeyd edib.
Rusiya ordusunun Donetsk cəbhəsində irəliləmək üçün böyük itkilər verdiyini iddia edən Zelenski Ukrayna qüvvələrinin rus qoşunlarının burada irəliləməsinə imkan vermədiyini qeyd edib.
Rusiyanın Ukraynada müharibəyə başlamaqla cinayət törətdiyini deyən Zelenski, Rusiyanın yüksək səviyyəli siyasi və hərbi rəsmilərinin mühakimə olunması üçün çalışdıqlarını bildirib.
“Biz artıq Beynəlxalq Cinayət Məhkəməsi (ICC) ilə əməkdaşlıq qurmuşuq və bu əməkdaşlığı artıracağıq. Təəssüf ki, mövcud beynəlxalq hüquqi sənədlər (Ukrayna müharibəsi məsələsində) ədalət üçün kifayət etmir” – deyə, Zelenski əlavə edib.
Ukraynada başlayan müharibədə günahkarların mühakimə olunması üçün beynəlxalq məhkəmənin də qurulması lazım olduğunu müdafiə edən Zelenski deyib: “Təcavüzün məsuliyyətini düzgün qiymətləndirmək üçün Beynəlxalq Cinayət Məhkəməsindən əlavə xüsusi bir məhkəməyə ehtiyac var”.
Busaat.az
