Çin ultra sürətli hipersəs raketləri yaratmaq yarışında Rusiyanı qabaqlayır və ABŞ bazalarını hər an vura bilər.
Busaat.az xəbər verir ki, bu barədə ABŞ Müdafiə Nazirliyinin (Pentaqon) Kəşfiyyat İdarəsindən Pol Freistler xəbərdarlıq edib.
Freistler Çinin ABŞ-nin Sakit okeandakı bazalarını “vura biləcəyini” söyləyib və ABŞ bazalarını istənilən vaxt vura biləcək silahları uğurla sınaqdan keçirdiyini bildirib.
Konqresdə danışan Freistler qeyd edib: “Strateji rəqabət mühitində, son bir neçə ildə baş verən hadisələr açıq şəkildə göstərir ki, rəqiblərimiz ABŞ-ni riskə atmağa yönəlmiş qabiliyyətlər inkişaf etdirir. ABŞ sensorlarından və müdafiə sistemlərindən yayınmaq üçün nəzərdə tutulmuş hipersəs silahlar həm nüvə, həm də ənənəvi imkanlara malikdir. Onlar çətin uçuş profillərinə və manevr qabiliyyətinə görə getdikcə daha mürəkkəb təhlükə yaradır”.
Çinin hipersəs silahlarında öndə olduğunu qeyd edən Freistler, “Həm Çin, həm də Rusiya bir çox uğurlu hipersəs silah sınaqları həyata keçirsələr və ehtimal ki, əməliyyat sistemlərini meydana çıxarsalar da, Çin həm dəstəkləyici infrastruktur, həm də sistem sayı baxımından Rusiyanı qabaqlayır”, – deyə əlavə edib.
“Çin hipersəs sürüşmə qabiliyyətinə malik qitələrarası ballistik raketi inkişaf etdirir və 2014-cü ildən bəri bir neçə uçuş sınaqları, o cümlədən 2021-ci ilin iyulunda dövrə vurma sınağı həyata keçirib”, – Freistler sözlərini tamamlayıb.
Busaat.az
