Ekspert: "Rusiya Türkiyənin dünyanın ən böyük ticarət tərəfdaşı olacaq"

Rusiya Türkiyənin ən böyük ticarət tərəfdaşı olacaq və iki ölkə prezidentlərinin ticarət dövriyyəsini 100 milyard dollara çatdırmaq niyyəti ilə bağlı bəyanatları bu tendensiyanı təsdiqləyir.

Busaat.az xəbər verir ki, bu barədə Türkiyənin Xarici Siyasət İnstitutunun direktoru Hüseyn Bağcı TASS-a bildirib.

“Ticarət dövriyyəsinin artım perspektivləri ilə bağlı Soçidə verilən bəyanatlardan belə nəticəyə gəlmək olar ki, Rusiya beş-on il ərzində Türkiyənin ən böyük ticarət tərəfdaşına çevriləcək”, – ekspert Soçidə iki ölkə prezidentlərinin son danışıqlarını şərh edərkən deyib.

Rəcəb Tayyib Ərdoğan və Vladimir Putin arasında şəxsi münasibətlər iki ölkə arasında ticari-iqtisadi əlaqələrin dinamik inkişaf amillərindən biridir, deyə Bağcı bildirib.

“Prezidentlər arasında xüsusi əlaqələr Türkiyə ilə Rusiya arasında əməkdaşlığın inkişafında mühüm rol oynayır. Rusiyaya qarşı tətbiq edilən sanksiyalarda iştirak etməməyimiz bizim üçün böyük şansdır. Bu, xüsusilə Ukrayna məsələsində yeritdiyi siyasət nəzərə alınmaqla, Türkiyənin beynəlxalq aləmdə çəkisinin artmasına təkan verir. Bundan əlavə, Türkiyə Rusiya ilə sıx əlaqələrə malik olmaqla, Moskvanın məlum taxıl müqaviləsi ilə bağlı mövqeyini Qərbə çatdıra bilər”, – ekspert əlavə edib.