Ermənistan Azərbaycandan sülh müqaviləsi ilə bağlı təkliflərinə cavab alıb.
Busaat.az xəbər verir ki, bu barədə Emənistanın baş naziri Nikol Paşinyan bildirib.
Paşinyan qeyd edib ki, tez-tez ictimai platformalarda, sosial şəbəkələrdə Ermənistan hökumətinin hansısa sənədi imzalamağa hazırlaşdığı bildirilir.
“Sizi əmin etmək istəyirəm ki, hansısa sənədin imzalanması ilə bağlı vəziyyət yaranarsa, bu, yaxşı xəbər olacaq. Çünki bu, danışıqlarda müsbət irəliləyişin əldə olunduğu anlamına gələcək. Biz isə uzunmüddətli sülh, sabitlik və inkişafı təmin etməli olan nəticəyə nail olmuş olacağıq”, – Paşinyan deyib.
Paşinyanın sözlərinə görə, Ermənistan sülh müqaviləsi layihəsi ilə bağlı Azərbaycana müntəzəm təkliflər təqdim edib.
“2-3 gün əvvəl Azərbaycandan cavab aldıq. Hansısa irəliləyiş varmı? Qeyd edək ki, müəyyən irəliləyişlər görürük. Amma nə qədər irəliləsək, bir o qədər fundamental problemlər üzə çıxır”, – deyə baş nazir bildirib.
“Bakı mümkün sülh müqaviləsinin köməyi ilə Ermənistan Respublikasının ərazisi ilə bağlı iddialarını birləşdirməyə çalışır. İrəvan üçün bu, “qırmızı xətt”dir”, – Paşinyan vurğulayıb.
Qeyd edək ki, Nikol Paşinyan fevralın 16-da hökumətin iclasında bəyan etmişdi ki, İrəvan öz təkliflərini Azərbaycan tərəfinə çatdıraraq Bakı ilə sülh müqaviləsi üzrə işin növbəti mərhələsini başa çatdırıb. Sənəd ATƏT-in Minsk qrupunun həmsədr ölkələrinə də təhvil verilib.
Busaat.az
