Ermənistan-Rusiya parlamentlərarası komissiyasının iclası zamanı Ermənistan parlamentinin binası yaxınlığında iki əks etiraz aksiyası keçirilib.
Bu barədə Busaat.az Ermənistan KİV-nə istinadən xəbər verir.
Məlumata görə, əvvəlcə qərbyönümlü qüvvələrdən ibarət kiçik bir qrup Ermənistan Milli Məclisinin binasının darvazası önünə toplaşaraq, “Rusiya satqındır”, “Rusiya sülhpərvər deyil, alverçidir” şüarları ilə anti-Rusiya plakatları nümayiş etdiriblər.
Bir müddət sonra həmin əraziyə Rusiya ilə dostluq və tərəfdaşlıq şüarları səsləndirən başqa bir qrup yaxınlaşıb.
“Tarixlə möhkəmlənmiş qardaşlıq”, “Qardaş xalqlar – ortaq gələcək”, – deyə plakatlardan bəzilərində yazılıb.
“Vətənini 2 qəpiyə satanlara münasibət bildirmək istəmirəm, burada Soros fondunun nümayəndələri toplaşıblar”, – deyə aksiya iştirakçılarından biri bildirib.
Bəzi şəxslərin qışqırtıları mübahisəyə səbəb olub və davaya çevrilmədən son anda dayandırılıb. Polis hər iki tərəfdən etirazçıları saxlayıb və qarşıdurmaya mane olmaq üçün onları ayırıblar.
