Ermənistanın əhalisi 2050-ci ilə qədər 2,6 milyon nəfərə qədər azalacaq.
Busaat.az xəbər verir ki, bunu BMT-nin İnsan Fondunun (UNFPA) Əhali və İnkişaf Proqramının əlaqələndiricisi Anna Ovanisyan jurnalistlərə bildirib.
Onun sözlərinə görə, bu, 2050-ci ilə qədər ümumi doğum əmsalının azalması ilə əlaqədardır. O, belə izah edib: “Əhalinin dəyişməz qalması üçün ümumi doğum əmsalı 2,1 olmalıdır”. Ekspert həmçinin, Ermənistan əhalisinin azalmasının səbəblərindən biri kimi miqrasiyanın artmasını göstərib.
Ovanisyan əmin olduğunu bildirib ki, əhalinin sayının artırılması proqramları həyata keçirilsə belə, prosesi dayandırmaq mümkün olmayacaq.
“Ermənistanda doğum səviyyəsinə sosial-iqtisadi problemlər də təsir edir” – deyə, o, əlavə edib.
BMT nümayəndəsi bildirib ki, Gürcüstan və Rusiyanın da əhalisi 2050-ci ilə qədər azalmağa, regionun digər ölkələrində isə artmağa davam edəcək.
Ovanisyan qeyd edib ki, dünya əhalisi artıq 8 milyard nəfər təşkil edir ki, bu da 2011-ci illə müqayisədə 1 milyard çoxdur.
