Ermənistanın qadınlara qarşı zorakılıqla mübarizə üçün hüquqi baza təklif edən İstanbul Konvensiyasını ratifikasiya etməsinin vaxtı çoxdan çatıb.
Busaat.az xəbər verir ki, bunu Avropa İttifaqının Ermənistandakı səfiri Andrea Viktorin Ermənistanda qadınlara zorakılığa qarşı koalisiyanın təşkil etdiyi konfransda bildirib.
Tədbir Avropa İttifaqının maliyyə dəstəyi ilə “Qadın hüquq müdafiəçiləri Ermənistanda gender əsaslı zorakılığa qarşı addımlar atırlar” layihəsi çərçivəsində keçirilir.
“Ermənistanın mübarizə aparmaq üçün mühit və hüquqi baza təklif edən İstanbul Konvensiyasını ratifikasiya etməsinin vaxtıdır. Bu siyasətin yanlış olduğunu deyən insanlara qarşı bir yerdə olmalıyıq. Ayrı-seçkiliyə qarşı aydın hüquqi baza lazımdır” – deyə səfir bildirib.
Səfirin fikrincə, ailə hər kəsin özünü təhlükəsiz hiss etməli olduğu yerdir, zorakılıq isə, susqunluq olan yerdə başlayır.
“Gənclərə ünsiyyət qurmağı, bir-birinə hörmət etməyi öyrətmək, kişi ilə qadın arasında heç bir fərq olmadığını söyləmək lazımdır” – deyə, o, əlavə edib.
Busaat.az
