Filippin prezidenti əhalini içməli suya qənaət etməyə çağırıb

Filippin prezidenti kiçik Ferdinand Markos ölkə əhalisini içməli suya qənaət etməyə çağırıb.

Busaat.az xəbər verir ki, bu barədə o, xalqa müraciətində bildirib.

“Biz yaxın aylarda başlaya biləcək El Ninoya hazırlaşırıq.Bufer su ehtiyatı yaradırıq, suvarma texnikasını yoxlayırıq. Lazım olsa buludları yığıb yağış yağdıracağıq. Bütün bunlarla yanaşı, həm də xalqımızı quraqlıq təhlükəsi qarşısında suya qənaət etməyə çağırırıq”, – prezident deyib.

Markos əlavə edib ki, bütün ölkə üzrə 6 mindən çox yağış suyu yığan sistem yaradılıb. Hökumət su təchizatı layihələrinin həyata keçirilməsinə 270 milyon dollar vəsait ayırıb.

Qeyd edək ki, El Nino orta hesabla 2-7 ildə bir dəfə baş verir və adətən 9-12 ay davam edir. Bu təbiət hadisəsi Sakit Okeanın mərkəzi və şərq subtropik hissəsində okean səthinin temperaturunun artması ilə əlaqədardır və ciddi quraqlığa səbəb ola bilər.

Busaat.az