Filippində daşqın və torpaq sürüşməsi nəticəsində ölənlərin sayı artıb.
Busaat.az xəbər verir ki, səlahiyyətlilər oktyabrın 27-dən bu yana 98 nəfərin daşqın və torpaq sürüşmələrində həyatını itirdiyini və tələfatların yarıdan çoxunun Maguindanao şəhərində baş verdiyini bildirib.
Nalgae tropik qasırğasının vurduğu ziyan Maguindanaoda ciddi həddə çatıb, şəhərdə daşqın və torpaq sürüşmələrində 53 nəfər ölüb.
80-100 nəfərin yerin altında qaldığı ehtimal edilən Maguindanaonun Kusionq kəndində axtarış-xilasetmə işləri davam edir.
Ordu və polisin iştirak etdiyi xilasetmə işlərinə könüllülər də dəstək verir. “Nalgae” qasırğası 2 milyona yaxın insana təsir edib və 975 mindən çox filippinli evlərini tərk etmək məcburiyyətində qalıb.
Manilanın Ninoy Aquino Beynəlxalq Hava Limanında (NAIA) pis hava şəraiti ilə əlaqədar 100-dən çox reys təxirə salınıb.
Filippin prezidenti Ferdinand Markos televiziya kanallarında yayımlanan çıxışında itkilərdən kədərləndiyini ifadə edərək, qeyd edib: “Daha yaxşısını etməliydik. Suyun həcminin bu qədər böyük olacağını təxmin etmədiyimiz üçün insanları xəbərdar edə bilmədik”.
Qeyd edək ki, hər il orta hesabla 20 fırtına və qasırğanın baş verdiyi Filippində 2013-cü ildə Haiyan Tayfunu səbəbiylə 6 mindən çox insan həyatını itirib və böyük dağıntı yaşanıb.
Busaat.az
