Finlandiya XİN: Türkiyənin narahatlığını aradan qaldıracağımıza ümid edirik

“Ümid edirik ki, Türkiyənin terror mövzusunda narahatlığını aradan qaldıra bilərik”.

Busaat.az xəbər verir ki, bunu Finlandiya xarici işlər naziri Pekka Haavisto terror təşkilatı PKK-nın həm İsveçdə, həm də Finlandiyada qadağan edildiyini ifadə edərkən deyib.

Dünya İqtisadi Forumunda (WEF) mətbuata açıqlama verən Finlandiyanın xarici işlər naziri Pekka Haavisto NATO-ya üzvlük prosesində Türkiyə, Finlandiya və İsveç arasında işçi qrupunun yaradıldığını xatırladıb.

Beynəlxalq səfərlərin davam edəcəyinə diqqət çəkən Pekka Haavisto deyib:

“Dostum Mövlud Çavuşoğlu ilə danışıqlarımız davam edir. Söhbət Ukrayna və Əfqanıstandakı son hadisələrdən gedir. Biz NATO-ya qəbul məsələsini də müzakirə edirik. Birbaşa və yaxşı ünsiyyətimiz var. Bilirəm ki, siz hazırda ABŞ-dasınız. ABŞ və Türkiyə arasındakı razılaşma (F-16-lar məsələsi) nə olursa olsun, NATO-ya qəbul prosesimizə töhfə verə bilər”.