Fransa 2 ay ərzində Ukraynaya AMX 10-RC tipli yüngül döyüş tankları göndərəcək.
Busaat.az xəbər verir ki, bu barədə Fransa Müdafiə Nazirliyindən verilən açıqlamada bildirilib.
Açıqlamaya görə, Fransa müdafiə naziri Sebastien Lecornu ilə Ukrayna müdafiə naziri Aleksey Reznikovun dünən telefonla danışıblar. Lecornunun ölkəsinin Rus təcavüzünə qarşı Ukraynaya dəstəyini bir daha təkrarladığı və Rusiyanın Ukraynanın mülki infrastrukturlarını hədəf alan bombardmanlarını pislədiyi bildirilib.
Açıqlamada, həmçinin, iki nazirin Fransanın Ukraynaya hərbi yardımını müzakirə etdiyi və Fransanın 2 ay ərzində AMX 10-RC tipli yüngül döyüş tanklarını Ukraynaya göndərməsinə qərar verildiyi bildirilib.
Fransa və Ukraynanın müdafiə nazirləri bu tanklardan istifadə etmək üçün ukraynalı əsgərlərə tez bir zamanda təlim təşkil etmək qərarına gəliblər.
