Fransada həmkarlar ittifaqının çağırışı üzərinə ictimai işçilər gələn il dövlət qurumlarında qənaətetmə planına qarşı bu gün tətilə çıxıblar.
Busaat.az xarici mətbuata istinadən xəbər verir ki, təşkil edilən nümayişlərə 200 min adam qatılıb.
Paytaxt Paris başda olmaqla, ölkə daxilində küçələrə çıxan ictimai işçilər iş şəraitinin yaxşılaşdırılması tələblərini dilə gətiriblər. Parisdə İqtisadiyyat Nazirliyinin Bersi binası yaxınlığında başlayan nümayiş İtaliya meydanında başa çatıb. Nümayişçilər hökumətdən dövlət işçilərinə hörmət etməyi tələb ediblər.
Ölkənin ən böyük həmkarlar ittifaqı olan Baş Həmkarlar İttifaqının (CGT) baş katibi Sofi Binet nümayişdə bildirib ki, ölkədə dövlət və özəl sektorlar daxil olmaqla, yüz minlərlə ixtisar olacaq.
“Ölkəmiz bizi narahat edən siyasi böhran içərisindədir. Prezident Emmanuel Makronu həmkarlar ittifaqı üzvlərinin və işçilərin səsini eşitməyə çağırırıq. Makronun xalqın ümumi maraqlarını müdafiə edərək prezidentlik vəzifəsini yerinə yetirməlidir”, – deyə Binet vurğulayıb.
Zeyd Bağırzadə
