Fransada pensiya islahatı ilə bağlı danışıqlar heç bir nəticə verməyib

Fransada hökumət və həmkarlar ittifaqlarının pensiya islahatı ilə bağlı danışıqları heç bir nəticə verməyib.

Busaat.az xəbər verir ki, həmkarlar ittifaqlarının nümayəndələri və Elizabet Borne Parisdə baş nazirlik ofisində bir araya gələrək pensiya islahatlarını müzakirə ediblər.

Bir saatdan az davam edən görüşdən sonra tərəflər razılığa gələ bilmədikləri barədə mətbuata açıqlamalar verib.

Fransa Xristian İşçilər Konfederasiyasının (CFTC) prezidenti Cyril Chabanier, Borne-ə pensiya islahatının nə qədər ədalətsiz qərar olduğunu söylədiklərini və geri çəkilməkdən başqa demokratik bir çıxış yolu görmədiklərini söyləyib.

İslahatın mövcud pensiya sistemindəki bərabərsizliyi dərinləşdirdiyini qeyd edən Chabanier, Fransadakı “sosial böhran”a “demokratik böhran”ın da əlavə olunduğunu bildirib.

Baş nazir Borne isə görüş zamanı  həmkarlar ittifaqlarına pensiya islahatının aparılması zərurətinin ifadə edildiyini və həmkarlar ittifaqı olmadan irəliləməyi planlaşdırmadıqlarını bildirib.

Busaat.az