Gürcüstan Müdafiə Nazirliyi Buk sistemlərini Ukraynaya qaytarmayacaqlarını bildirib

Gürcüstan “Buk” zenit-raket komplekslərini Ukraynaya qaytarmaq niyyətində deyil.

Busaat.az xəbər verir ki, bu barədə məlumat Gürcüstan Müdafiə Nazirliyinin rəsmi hesabatında yer alıb.

Bundan əvvəl Ukraynanın Gürcüstandakı müvəqqəti işlər vəkili Andrey Kasyanov “Avropa həqiqəti”nə müsahibəsində bildirib ki, Kiyev 2008-ci ildə hərbi əməliyyatlar zamanı təhvil verilmiş “Buk” yer-hava raket komplekslərinin geri qaytarılması üçün Tbilisiyə sorğu göndərib.

“Ukraynanın Gürcüstana “Buk” hava hücumundan müdafiə sistemləri verməsi faktı doğru deyil. Müdafiə Nazirliyi “Buk” sistemlərini 2007-ci ildə çox milyon dollarlıq satış müqaviləsi yolu ilə əldə edib” – deyə, Gürcüstan Müdafiə Nazirliyi bildirib.

Gürcüstan parlamentinin hakim “Gürcü Arzusu” partiyasından olan deputatı Givi Mikanadze bəyan edib ki, Kasyanovun Kiyev hakimiyyətinin 15 il əvvəl Tbilisiyə verilmiş silahları geri qaytarmaq xahişi ilə bağlı dediyi sözlər növbəti dəfə gürcüləri hərbi münaqişəyə daxil etmək cəhdidir.

Busaat.az