Gürcüstanda sərhəd polisi əməkdaşlarının Samtsxe-Cavaxetiya rayon prokurorluğunun əməkdaşları ilə birgə apardığı istintaq və əməliyyat tədbirləri nəticəsində Ninotsminda bələdiyyəsində insan alveri ilə məşğul olan Ermənistan vətəndaşı ata və oğul saxlanılıb.
Busaat.az xəbər verir ki, bu barədə Gürcüstan Daxili İşlər Nazirliyi məlumat yayıb.
Araşdırmalar zamanı müttəhimlərin 2015-2016-cı illərdə üç Ermənistan vətəndaşına yaxşı iş şəraiti vəd edərək, lazımi sənədləri toplamalarına kömək etdikləri və onları Gürcüstana öz avtomobillərində gətirdikləri məlum olub.
Erməni ata-oğul gətirdikləri şəxsləri Ninotsminda bələdiyyəsindəki bir kəndin yaxınlığındakı bir heyvandarlıq təsərrüfatına aparıb, orada təhdid edərək qanunsuz məcburi əməyə sövq ediblər. Bundan əlavə, müttəhimlərin qanunsuz olaraq saxlanılan şəxslərin sərbəst hərəkətini məhdudlaşdırdıqları və müşahidə kameraları vasitəsilə onları mütəmadi izlədikləri bəlli olub.
Hüquq-mühafizə orqanlarına cinayət barədə Ermənistan vətəndaşlarından birinin fermadan qaçması nəticəsində məlumat daxil olub. Belə ki, sözügedən şəxs Gürcüstan dövlət sərhədini Ermənistan istiqamətində qanunsuz keçməyə cəhd göstərərkən sərhəd polisi tərəfindən saxlanılıb.
Faktla bağlı cinayət işi başladılıb. Hər iki şəxsi cinayətə görə 12 ildən 15 ilə qədər həbs cəzası gözləyir.
