Gürcüstanda 4 telekanal 24 saatlıq yayımı dayandırıb.
Busaat.az “Sputnik Gürcüstan”a istinadən xəbər verir ki, telekanallar ölkənin Baş naziri İrakli Qaribaşvilinin istefasını və zorakılıq törədən hər bir kəsin cəzalandırılmasını tələb edir.
Məlumata görə, yayımı dayandıran 4 telekanal “TV Pirveli”, “Mtavari arxi”, “Formula” və “Kavkasiya”dır. Bu kanalların ekranlarında qara fonda iyulun 5-də Tbilisidə zorakılığa məruz qalmış jurnalistlərin siyahısı təqdim olunur.
Qeyd edək ki, bu jurnalistlərdən biri olan “TV Pirveli” teleşirkətinin operatoru Lekso Laşkarava zorakılığa məruz qaldıqdan 6 gün sonra evində dünyasını dəyişib. O, dünən dəfn olunub.
Xatırladaq ki, son günlər Tbilisidə özlərini ənənəvi dəyərlərin qoruyucuları adlandıran LGBT əleyhdarları aksiyalar keçirib. Buna səbəb isə “Tbilisi Pride” qeyri-hökumət təşkilatının iyulun 5-də paytaxtda LGBT icmasına dəstək məqsədli “Ləyaqət marşı” keçirmək istəməsi olub. Bu aksiyalar zamanı etirazçılar jurnalistlərə qarşı kobud davranış sərgiləyiblər.
Gürcüstan DİN-in məlumatına əsasən, qarşıdurmalar zamanı jurnalist, operator və fotoqraflardan ibarət 53 nəfər xəsarət alıb.
