Şotlandiya Milli Partiyasının (SNP) yeni lideri seçilən Hamza Yusuf Şotlandiya parlamentində keçirilən səsvermədən sonra ölkənin ilk müsəlman baş naziri olub.
Busaat.az xarici mediaya istinadən əbər verir ki, fevralda Şotlandiyanın baş naziri Nikola Sturgeon istefa verdikdən sonra səhiyyə naziri Hamza Yusuf Şotlandiya Milli Partiyasının (SNP) yeni lideri seçilib. Pakistan əsilli 37 yaşlı Yusuf Böyük Britaniyada böyük bir partiyaya rəhbərlik edən ilk müsəlman lider kimi qeydə alınıb. Yusuf bu gün Şotlandiya parlamentində keçirilən səsvermədən sonra ölkənin ilk müsəlman baş naziri olub.
Müxalifətin 3 partiya lideri Yusufun baş nazirliyinə qarşı çıxsa da, buna nail ola bilməyiblər. Yusuf 129 yerlik parlamentdə 71 deputatın dəstəyi ilə ölkənin altıncı baş naziri olub. Rəqibləri Duqlas Rossu 31 deputat, Anas Sarvarı 22 deputat və Aleks Koul-Hamiltonu 4 deputat dəstəkləyib.
Səsvermədən əvvəl çıxış edən Yusuf ölkədə milli azlıq təşkil etdiyini bildirib və onun baş nazirlik yarışında iştirakının ölkənin əldə etdiyi irəliləyişin əlaməti olduğunu vurğulayıb.
“Mən söz verirəm ki, Şotlandiya dünya səhnəsində müsbət və mütərəqqi səs olaraq qalmağa davam edəcək”, – deyən Yusuf müstəqilliklə bağlı fikirlərindən asılı olmayaraq bütün deputatların fikirlərinə diqqətlə qulaq asacağını və hörmət edəcəyini əlavə edib.
Yusufun sabah Edinburqdakı Şotlandiya Ali Məhkəməsində qısa bir mərasimlə and içəcəyi gözlənilir.
