"Hindistan-Rusiya müdafiə tərəfdaşlığını heç kim dayandıra bilməz” - BrahMos rəhbəri

Qərbin cəhdləri Rusiya-Hindistan müdafiə tərəfdaşlığına mane olmayacaq.

Busaat.az TASS-a istinadən xəbər verir ki, bu sözləri Hind-Rusiya Birgə Müəssisəsinin baş icraçı direktoru Atul Dinkar Rane bildirib.

İcraçı direktorun sözlərinə görə, Qərb ölkələri Hindistan-Rusiya müdafiə və təhlükəsizlik əməkdaşlığını heç vaxt dayandıra bilməyəcək.

“Kimsə buna cəhd etsə, o, ancaq uğursuz olacaq… Hindistanlı alimlərlə rus texnoloqları arasında əlaqələr indi o qədər dərindir ki, bunu pozmaq mümkün olmayacaq. Biz həmişə ruslarla işləməyin daha asan olduğunu deyəcəyik”, – deyə o, əlavə edib.

O vurğulayıb ki, Qərbin Rusiyaya qarşı tətbiq etdiyi birtərəfli sanksiyalar BrahMos Aerospace-in fəaliyyətinə təsir göstərməyib.

“Biz bütün bu sanksiyalara baxmayaraq, irəliləyirik. Problemlər var, lakin onları müzakirə edərək, həll edə bilmişik. Təchizat zəncirlərində heç bir problemimiz yoxdur, müzakirə etməkdə problemimiz yoxdur, səyahət etməkdə və bir-birimizlə danışmaqda problem yoxdur “, – deyə Rane bildirib.

Busaat.az